Parte do noso traballo de difusión no grupo operativo incluíu a celebración dun webinar para a presentación dos resultados preliminares destes dous últimos anos de traballo. Por iso, este mércores celebramos, da man de Slow Food Compostela, unha sesión aberta a todas aquelas persoas interesadas no noso proxecto para coñecer máis de fondo o noso traballo e algún exemplo interesante dun novo entrante no sector agrario. 

A xornada consistiu na presentación das nosas actividades e o que supón ser un grupo operativo por parte de Alicia, a nosa compañeira e técnica de coordinación e representante de EFA Fonteboa. Posteriormente, Guillermina Fernández, que colabora dende o LaboraTe, fixo unha breve introdución ás principais temáticas que motivaron a validación da nosa proposta: o envellecemento das xefaturas de explotación e o descenso de relevo xeracional no sector, que, unidos á concentración da actividade agraria en determinadas comarcas galegas e ao abandono progresivo doutras, constatan aínda máis a importancia de perfís alternativos ás persoas sucesoras das granxas familiares clásicas.

Convidamos tamén a Miguel Roig, xerente de Os Biosbardos, para que nos contara como foi a súa experiencia de entrada no sector, coas súas peculiaridades, vantaxes e sobre todo, as aprendizaxes adquiridas durante toda a etapa de consolidación do proxecto. Podedes ler máis sobre o seu proxecto na publicación que fixemos hai un tempo sobre a súa entrevista para este proxecto, así como consultar as últimas novidades (que teredes para aburrirvos) na súa páxina web e redes sociais!

^{Imaxe 1. Durante a presentación de Miguel.} 

Para seguir, entramos na parte máis técnica da webinar, coa presentación dos nosos produtos máis importantes, as guías de acompañamento a persoas novas entrantes tanto no sector de forma xeral, coma na terra de forma específica. Os nosos produtos van dedicados especialmente, aínda que non de forma exclusiva, a persoal técnico encargado no acompañamento e aconsellamento a persoas novas entrantes. Estas inclúen, como indicou a nosa compañeira Elena López no caso da Guía e inventario de recursos de apoio ás persoas novas entrantes no sector, unha breve guía de uso da mesma, unha descrición dos roles que as entidades de acompañamento poden asumir neste, así como unha explicación das etapas que se poden seguir para un acompañamento axeitado. Nieves Pérez, pertencente ao LaboraTe, fixo unha breve introdución á guía específica de acceso á terra que, seguindo a mesma filosofía ca guía xeral, se centra especificamente no acompañamento no acceso a terras con potencial agrario. Ámbalas dúas estarán dispoñibles nesta páxina web, no apartado de resultados, unha vez maquetadas, para o cal faremos unha publicación proximamente. Seguiremos informando!

^{Imaxe 2. Durante a exposición das guías.} 

Os Grupos de Desenvolvemento Rural (GDR) son entidades de traballo a nivel local que se encargan de levar a cabo proxectos non só relacionados co sector primario senon tamén cunha visión multisectorial moito máis amplia para tratar de apuntalar proxectos e iniciativas viables no noso territorio. Así, tratan de apoiar empresas de corte produtivo pero tamén outro tipo de proxectos como aqueles centrados na dotación de servizos e equipamentos. Por iso, á hora de apoiar ás persoas novas entrantes no sector agrario, estas entidades son fundamentais no ofrecemento dunha visión amplia e diversificada, podendo apoiar aos novos proxectos tanto no seu nacemento como na súa aposta por actividades complementarias á produción primaria.  

Dende Terractiva cremos que o persoal técnico destas entidades ten moito que dicir, posto que temos a seguridade de que moitos deles xa teñen recibido consultas por parte de persoas novas entrantes na súa busca por alternativas ás súas ideas ou a proxectos xa iniciados. Ademais, estas entidades, xunto con outras como cooperativas e outras entidades de economía social, entidades locais, asociacións do ámbito agroforestal, entre outras, poden ter a condición de entidade colaboradora coa Axencia Galega de Desenvolvemento Rural e ofrecer servizos de intermediación e acompañamento, tal e como indica o Artigo 17 da LEI 11/2021, do 14 de maio, de recuperación da terra agraria de Galicia. Así, este martes reunímonos nas instalacións do CISPAC (Centro de Investigación Interuniversitario de los Paisajes Atlánticos Culturales), na Cidade da Cultura de Santiago, para compartir coñecemento, experiencias e opinións e poder plasmar os resultados nos nosos produtos, tratando de, ante todo, obter unha ferramenta útil para o desenvolvemento do seu traballo que permita aumentar a taxa de éxito destes novos perfís.  

^{Imaxe 1. Durante un momento da presentación do proxecto.}